Koncert i këngës Labe

Muajt tetor, nëntor dhe dhjetor do te jene periudhë aktivitetesh kulturore dhe artistike për shoqatën ”Vatra Labe” dhe gjithë komuniteti shqiptar emigrantë në greqi.
Miq të nderuar, dashamirës dhe dëgjues të Iso-Polifonisë (kënga labe). Ju njoftojmë se:
Shoqata kulturore Vatra Labe, në bashkëpunim me grupet e shquara të Iso-polifonisë në emigracion, posaçërisht në Athinë, përkatësisht me grupin ”Buron kënga labe” me drejtues grupi artistin popullor Mujo Lala, me grupin polifonik ”Lot Kurbeti” me drejtues grupi këngëtarin e talentuar Shezo Bushi, si edhe grupin tjetër polifonik, të mirënjohur në jetën artistike të emigrantëve me drejtues grupi Ilir Hoxha, me dt.17 tetor 2014, jep një koncert të pasur polifonik. Me një repertor të pasur dhe të përzgjedhur këngësh, të njohura dhe të reja, me tematikë dhe motive nga jeta dhe puna në emigracion dhe atdhe, me një kolorit dhe melodikë të traditës do të përcjellin për ne, një cikël këngësh dhe vallesh të kënduara.
Në kuadër të programit të saj të aktiviteteve kulturore dhe artistike, shoqata Vatra Labe organizon këtë koncert të hapur polifonik, duke ftuar komunitetin emigrant të bëhet pjesë aktive e kësaj shfaqjeje e cila do të jetë njëra prej aktiviteteve më të rëndësishme të saj, në kuadër të ruajtjes dhe përcjelljes së traditave tona më të mira për komunitetin dhe brezat më të rinj. Grupeve polifonike që do të pjesëmarrin, do tu bashkangjitet gjithashtu edhe këngëtari i mirënjohur i muzikës popullore Altin Basho, edhe ky me këngë të reja, me repertorin më të mirë të tij. Koncerti polifonik dë të jepet në dt.17 tetor, ditën e premte dhe ora 18:30. Hyrja e lirë
Adresa do të jetë: Rruga ”TIMOKREONDOS”-6–A–11745Neo Kozmos.

Ju ftojmë të bëheni pjesë e këtij evenimenti të rëndësishëm folklorik dhe etnomuzikor.

Ju mirëpresim!

8 vjet pa Haxhi Dalipin!

 

Për ata që nuk e kanë njohur do të mjaftonte t`ju kujtonim, se prej dorës së tij, kënga popullore “Janinës çi panë sytë” u bë gati si një këngë kombëtare (kënduar nga grupi iso-polifonik i Lapardhasë), dhe pak kohë para se të ndërronte jetë, në shtator te vitit 2006, ishte drejtori i parë i Ansamblit të Këngëve dhe Valleve Popullore pas viteve 1990. Na mungon vërtet Haxhi, pavarësisht se për ty nuk ka ndonjë ditë të zyrtare të shënuar në kalendar, që të na kujtojë, përveç datës së thjeshtë të 20 Shkurtit të 1941 kur t`i linde në Gjirokastër, në këtë qytet që sot mbrohet nga Unesco si “Pasuri kulturore e njerëzimit”. Na mungon Haxhi, se edhe ti ishe një vlerë e çmuar për familjen, muzikën, shoqërinë dhe trashëgiminë tonë kulturore. Ishe i tillë se kudo ku ti ishe vetëm ndërtove, nuk shkatërove.

Më kujtohet viti 1997, kur na prisje në Vlorë, më 28 Nëntor, për të përgatitur festimet e 85 vjetorit të shpallje së Pavarësisë së Shqipërisë. Vlora ishte akoma në tym dhe e plagosur. Dy autobuzët me artistët e operas që vinin në Vlorë për të bërë provat e koncertit i prite Ti dhe u dhe zemër me praninë tënde dhe të disa muziktarëve të tjerë vlonjatë, të cilët me veglat muzikore në duar ju bashkuan kolegëve të tyre nga Shqipëria dhe Kosova. Ende kishte të shtëna në ajër, ditën dhe natën. Atë natë ti dirizhove, dirizhove Himnin Kombëtar në fillim të koncertit. Kishe kohë pa dirizhuar Haxhi, se s`kishe ku, por na emocionove të gjithëve që e dëgjuam atë në Pallatin e Sportit. “Ku mund të këndohet më mirë se në Vlorë Himni i Flamurit”?-na the atë darkë të paharruar, në Vlorën që po linte pas të shkuarën.

Kështu ishe ti Haxhi, e doje muzikën po aq sa Vlorën, Gjirokastrën dhe gjithë Shqipërinë. E fillove rrugën me instrumentin e flautit në vitet 1957-1961 në Liceun Artistik nën drejtimin e Profesorit tonë të shquar Ramadan Sokoli. Prej andej vazhdove me dirizhimin me Prof. Konstandin Trakon në Institutin e Arteve ku përfundove në vitin 1973. Pas kësaj gjithë kohën në Vlorë dhe Tiranë. Krijove ansamble, orkestrën simfonike dhe drejtove shkollën e muzikës dhe qendrën kulturore të Vlorës për vite me rradhë. Kush nuk ta di sa duhet vlerën e punës tënde le të dëgjojë një çast iso-polifoninë e Vlorës. Sot iso-polifonia shqiptare është “Kryevepër e trashëgimisë gojore të njerëzimit” mbrojtur nga UNESCO. Je dhe ti aty Haxhi! E dije këtë gjë që atë ditë kur na erdhi lajmi i bardhë. E dije se ishe edhe ti që e ngrite interpretimin e grupeve iso-polifonike të Vlorës në lartësitë artistike që i do iso-polifonia. E njihje si mjeshtri punën iso-polifoninë, dhe atë të Vlorës në veçanti. E këndove atë, e shkrove dhe kumtove vlerat e saj në Shqipëri dhe jashtë saj…

Na mungon Haxhi, i mungon familjes, studentëve të Akademisë së Arteve, kolegëve të tu muziktarë, miqve dhe shokëve në Tiranë, Vlorë dhe në gjithë Shqipërinë. Na mungon se ike para kohe. U largove befas, ashtu siç lëvizje ndonjëherë dorën tënde, si për të treguar se po ikën diku afër.

Në fakt shpirtërisht je afër. Je afër se emri tënd i nderuar kujtohet, ashtu si portreti yt fisnik bashkë me muzikën që kompozove dhe studimet e tua. Je afër se edhe Vlora ku t`i le amanet të prehesh, të futi në rradhët e qytetarëve të saj të nderit dhe urojmë që emrin tënd ta mbajë së shpejti edhe shkolla e muzikës së Vlorës. Je afër se te njerëzit dhe dashuri, për të cilën edhe sot të kujtojnë. Të kujtojnë se i kujtove. Ti vetë nuk le artist të vjetër pa kujtuar dhe nderuar Haxhi, kur drejtove Ansamblin Kombëtar të Këngëve dhe Valleve Popullore…

Eshtë koha që ti të kujtohesh dhe ne të kujtojmë sot e gjithë ditën. Të kujtojmë Ty se bashku me profesorët dhe kolegët tanë të nderuar që s`jetojnë më si: Cesk Zadeja, Tish Daija, Gjon Simoni, Feim Ibrahimi, Kujtim Laro etj. Kjo është tradita jonë dhe aty je dhe ti. Sot Haxhi, në Labëri po bie shi. Një shi nga ata që thonë se e sjellin lebërit kur këndojnë. Ta dish se kanë edhe për ty një këngë a një borrohite vendi. Me iso! Po vjen!

 

Vasil S. Tole, shkrim i botuar ne pervjetorin e trete te vdekjes se Tij ne shtypin e kohes.

Shkolla Shqiptare e Athines

Nga Klodian Balili

Viti i ri shkollor për “Shkollën shqiptare të Athines”, i cili zhvillohet nën kujdesin e shoqatës “Lidhja për bashkëpunimin shqiptaro-greke“ ka filluar që në fillimin e muajit Tetor. Mësimet zhvillohen në ambjente moderne, me të gjitha kushtet e nevojshme, të ofruara nga vetë shoqata. Çfarë cilësohet si e veçantë, në këtë  vit shkollore është rregjistrimi i fëmijëve në klasat e para. Në këto klasa janë rregjistruar 66 fëmijë, të cilët janë caktuar në 5 klasa.  Dy aspekte janë esenciale: 1) E para dhe më kryesorja tregon që komuniteti shqiptar i emigrantëve në Greqi është ndërgjegjësuar për vlerat që ka mësimi i gjuhës shqipe, si nga ana e diturisë, (mësimi i gjuhës amëtare) por dhe për fakti se gjuha mbetet instrumenti kryesor i të ardhmes së çdo individi. 2) E dyta, ky ndërgjegjësim i prindërve por edhe dëshira dhe vullneti i fëmijëve për të mësuar gjuhën shqipe na ofron mbështetje dhe kurajo për të vazhduar përpara iniciativën e ndërmarrë nga kjo shkollë. Disa prej mangësive që vërehen në këtë vit shkollor si edhe më përpara janë: mungesa e abetareve, për të cilat është ofruar një lloj garancie nga Ambasada shqiptare në Athinë për sigurimin e tyre, në rast të kundërt abetaret do të mundësohen nga ne duke i blerë nga një shtëpi botuese në Shqipëri.

Një tjetër dizavantazh në mund ta quajmë të tillë, mbetet mbështetja e ofruar nga shteti shqiptar, i cili duhet të ofronte më shumë mbështetje për shkollat shqiptare kudo që ato ndodhen në emigracion. Fëmijët shqiptarë kudo ku jetojnë jashtë atdheut të tyre janë ambasadorët e vërtet të interesave të kombit shqiptar në shumë aspekte: histori, tradita, zakone, kulturë si dhe transmetimin brez pas brezi të gjuhës shqipe në mënyrë të tillë që gjurmët e saj të mos humbasin.
Une dua të jem realist për situatën dhe kohën në të cilën jetojmë, ndërkohë që qeveria e re shqiptare po përpiqet të rindërtojë një identitet të ri presim prej saj nëpërmjet të zgjedhurve të saj, të na mbështesin dhe të na krijojnë mundësinë për të përhapur gjuhën shqipe në brezat e rinj.

Une dua ta kthej vëmendjen te komuniteti i emigranteve në Greqi sepse sa më shumë të jemi të bashkuar aq më shumë do të dëgjohen kërkesat si dhe të drejtat tona si nga shteti ynë ashtu edhe nga ai grek. Një kontribut të vyer mund të ofrojnë dhe kompanitë private në Shqipëri, të cilat kanë mundesinë të na ndihmojnë nëpërmjet sponsorizimeve të ndryshme.

Shkolla shqiptare në Athinë funksionon si një degë e Lidhjes për bashkëpunimin shqiptaro-greke, dhe si e tillë ajo njihet edhe ligjërisht nën kuadrin e kësaj lidhjeje. Si nënkryetar më përket të garantoj krijimin e kushteve të përshtatshme për mbarëvajtjen e mësimdhënies por edhe të vet funksionimit të shkollës në tërësi. Njëkohësisht, mbetet e rëndësishme roli i stafit pedagogjik dhe krijimi i të gjitha kushteve dhe plotësimi i kërkesave të profesorëve. Pas mbylljes së kompanisë “besxpert” e cila ka financuar shkollën për gjith këto vite, vështirësitë ekonomike janë shtuar së tepërmi por megjithatë kemi arritur të sigurojmë buxhetin edhe për këtë vit shkollor. Dëshira jonë është që kjo shkollë të vazhdojë të funksionojë edhe në vitet në vazhdim, por kjo do të varet nga disa faktor kyç: 1)Interesimi dhe kërkesa e emigrantëve për të mësuar gjuhën; 2) ndihma ekonomike ngado që ajo mund të vijë, qoftë edhe nga shteti shqiptarë ose biznes privat; 3) gadishmëria dhe dëshira e shoqatës për të vashduar këtë punë për të cilën unë jam i sigurt se dëshira e madhe nuk mungon për aq kohë sa kjo lidhje do të ekzistojë.

 

Te pastrojme Shqiperine

Shkolla Shqiptare e Athinës

Shkolla Shqiptare e Athinës, siç e thëret prej 8-vitesh komuniteti shqiptar në Athinë, organizon Mësimin Plotësues të Gjuhës Shqipe për të tetin vit me rradhë edhe në vitin shkollor 2013-2014.

Shkolla funksionon nën drejtimin e “Lidhjes për Bashkëpunimin Shqiptaro-Grek” krijuar në vitin 2006 nga nxënësit emigrantë të shkollës së informatikës BestXpert të çiftit Lorenc dhe Orjeta Koka dhe ligjëruar nga Gjykata e Athinës në vitin 2009. Biznesi BestXpert ishte gjithë këto vite sponsorizuesi bazë i Shkollës Shqiptare të Athinës duke ofruar falas për vite me rradhë mjediset dhe klasat për zhvillimin e mësimeve të gjuhës shqipe nga mësueset vullnetare. Gjithashtu sponsorizime nga prindër dhe biznesmen shqiptarë kanë qenë dhe janë një ndihmë e madhe që shkolla të funksionojë gjithë këto vite.

Vazhdimisht Lidhja ka organizuar dhe organizon aktivitete të shumta kulturore dhe argëtuese me nxënësit dhe dashamirësit e shkollës. Këto aktivitete na kanë ndihmuar të njihemi më mirë me njeri tjetrin dhe të zbavitemi në mënyrë të kulturuar dhe mbi të gjitha kanë ndihmuar jo vetëm në ruajtjen e gjuhës, traditave dhe zakoneve të origjinës, por edhe të njihemi më mirë me kulturën dhe historinë e vendit pritës duke ndihmuar në integrimin me dinjitet në shoqërinë vendase.

Në këtë moment ofrojnë ndihmën si mësuese vullnetare pranë shkollës sonë zonjat: Ermira Morina, Mimoza Hida, Entela Ballaci/Kondi dhe Julina Pesha/Sinani.

Fjale te urta
Mos i shiko gunen po punen